Sindikata e Bashkuar e Arsimit Shkencës dhe Kulturës

Më datën 3 dhe 4 qershor do të qëndrojë në Prishtinë, sekretari i përgjithshëm i EI-së,z. Fred van Leeuwen, i cili përfaqëson 30 milionë anëtarë nga e tërë bota , duke përfshirë edhe SBASHK-un. Leeuwen do të shoqërohet nga z. Walter Dresscher, nënkryetar i Komitetit të Sindikatave Evropiane të Arsimit ( ETUCE) dhe kryetar i AOB-së ( Sindikata e Arsimit e Holandës).
Për SBASHK-un është një nder i madh dhe kënaqësi e veçantë që do të ketë mysafirë këta njerëz, të cilët në kohët më të vështira për arsimin e Kosovës në vitet 90-99 gjithmonë ishin përkrah punonjësve të arsimit të Kosovës. Angazhimi i tyre i madh ka bërë që e vërtetat mbi arsimin e Kosovës të debatohej në Asamblenë e Përgjithshme të UNESCO-së në vitin 1993, pas fjalës së kryetarit të atëhershëm të SBASHK-ut, dr. Agim Hyseni. Po ashtu z. Fred dhe z.Walter kanë dhënë kontribut të veçantë që SBASHK-u në vitin 1996 të pranohej si anëtare me të drejta të barabarta në EI. Ky angazhim i tyre ka vazhduar edhe pas luftës dhe me ndihmën e tyre në vitet 99- 2000 janë ndërtuar , rinovuar e pajisur 52 shkolla në Kosovë, që ishin shkollat e para të ndërtuara pas luftës.
Kontributin e tyre e kanë vazhduar edhe me trajnimin e mësimdhënësve për reformat në arsim. Këto janë vetëm disa nga kontributet që kanë dhënë për mbështetjen ndaj arsimit në Kosovë dhe SBASHK-ut në veçanti.
SBASHK-u ndjehet i nderuar me këtë vizitë aq më tepër kur dihet se z. Fred dhe stafi i tij janë shumë të zënë në angazhimet për përgatitjen e Kongresit 7 të EI-së, që mbahet në muajin korrik në Otavë të Kanadasë.
Vizita pikërisht në këto momente të mëdha të angazhimit të EI-së dëshmon edhe një herë përkushtimin e EI-së dhe ETUCE-së që kanë për SBASHK-un, që si gjithmonë , edhe tani të jenë përkrahës të kërkesave të sindikalistëve të arsimit në Kosovë, të shohin nga afër arritjet, sfidat dhe nevojat që ka SBASHK-u për përkrahje nga EI dhe ETUCE.
Gjatë qëndrimit në Kosovë pritet që ky delegacion të vizitojë edhe ndonjë institucion arsimor dhe të ketë takime me udhëheqës vendor.