Sindikata e Bashkuar e Arsimit Shkencës dhe Kulturës

19.11.2024

Deklarimet e Qeverisë Kurti së po bëhen plotësim ndryshime në Ligjin për skemat pensionale të financuar nga shteti kishin ngjallur entuziazëm të deputetët dhe populli shqiptar me shpresën se do të përmirësohet një padrejtësi e madhe dhe ashtu si u njiheshin mësimdhënësve, që punuan në vitet 90-ta në sistemin arsimor të Republikës së Kosovës, do t’u njihen këto vite si kontributdhënëse edhe të dëbuarve dhunshëm nga puna aparati represiv serb.

Mirëpo me plotësim ndryshimet në skemën pensionale të bëra në korrik 2023 me Ligjin nr.08L-248 nuk u ndihmuan të dëbuarit dhunshëm nga puna e nga ana tjetër dëmtuan rëndë të pensionuarit e arsimit duke ua mohuar të drejtën e fituar për vitet e 90-ta, që në nenin 8, pika 6 e Ligjit bazik për skemat pensionale të financuara nga shteti ua njihnin këto vite si kontributdhënëse dhe gëzonin pension të plotë të punës.

Kështu si është gjendja tani me Ligjin për skemat pensionale qytetarët e Kosovës dhe deputetët e nderuar duhet ta dinë se vazhdojnë të shpërblehen ata që pranuan masat dhe nënshkruan lojalitetin ndaj pushtuesit serb, ndërsa po ndëshkohen ata që punuan në sistemin arsimor të Republikës së Kosovës në vitet 90-ta dhe gjithë të tjetër që vepruan aq sa mundën për realizimin e idealit dhe ëndrrës për shtetin e lirë të Kosovës.

Thënë shkurt gjithë ata që ishin pjesë e aparatit represiv serb marrin tani pensione më të larta e të plota të punës, ndërsa ata që punuan e vepruan për Republikën e Kosovës marrin pensione më të ulëta, pra ishin të maltretuar e të rrahur në vitet e okupimit dhe janë të ndëshkuar edhe tani në shtetin për të cilin kanë bërë gjithë ato sakrifica sublime.

Për ta hequr këtë padrejtësi ne kemi dorëzuar Nismën legjislative nga qytetarët për miratimin e Projektligjit për ndryshimin dhe plotësimin e Ligjit nr. 04L-131 për skemat pensionale të financuara nga shteti, të ndryshuar dhe plotësuar me Ligjin nr. 08L- 248 duke kërkuar nga deputetët që ta votojnë Projektligjin e kësaj nisme dhe t’u njohën si vite kontributdhënëse vitet e 90-ta të dëbuarve dhunshëm nga puna, t’u kthehet kjo e drejtë punëtorëve të arsimit që punuan pa u ndalur në ato vite dhe të njihen si vite kontributdhënëse edhe viti 2000, 2001 e deri në korrik 2002, kur filloi se vepruari Trusti pensional.

Në këtë drejtim, SBASHK-u ka dërguar kërkesa për takime kryetarëve të subjekteve politike shqiptare dhe shefave të Grupeve Parlamentare për takim lidhur me këtë çështje shumë të ndjeshme e do t’u dërgoj letra edhe gjithë deputetëve me lutjen që të angazhohen që kjo nismë të arrij sa më shpejt në Parlament dhe të votohet nga ata. Jemi të bindur se gjithë deputetët do ta votojnë ndryshimin e propozuar nga nisma qytetare për Ligjin e skemave pensionale të financuara nga shteti dhe nuk do të lejojnë që të vazhdojë realiteti i keq që të shpërblehen ata që ishin me pushtuesin serb, e të ndëshkohen ata që ishin me Republikën e Kosovës.

13.11.2024

Unioni i Sindikatave të Arsimit të Evropës është duke zhvilluar një varg aktivitetesh para Konferencës vjetore të këtij Unioni, që do të mabahet më 26 e 27 nëntor në Budva të Malit të Zi me temën kyçe të debatit: “Lufta për të Ardhmen e Arsimit Publik në një Evropë Sociale”. Konferenca në Budva do të përfshijë diskutime të rëndësishme, debate mbi rezolutat dhe mundësinë për të fuqizuar solidaritetin me kolegët kudo në vendet e Evropës. Një aktivitet i rëndësishëm para kësaj Konference është edhe takimi nga larg me përfaqësues të Sindikatave të Arsimit të Evropës, që u zhvillua sot, më 13 nëntor e pjesë e të cilit ishin edhe përfaqësuesit e SBASHK-ut Rrahman Jasharaj, Vjollca Shala e Ymer Ymeri. Udhëheqësit e Unionit të Sindikatave të Evropës u kanë bërë thirrje përfaqësuesve dhe veprimtarëve të sindikatave anëtare që të ndihmojnë në përhapjen e zërit sindikal dhe të zhvillojnë aktivitete sindikale në shtetet e tyre për të avancuar arsimin cilësor gjithëpërfshirës publik dhe për të ngritur statusin e profesionit të mësuesit në rajonin e tyre, Në këtë takim nga larg u prezantua edhe rrjedha e aktivitetit "Go Public! Fund Education”, apo në shqip “Financo arsimin publik, fushatë me fokus në Evropë. Përfaqësuesit e sindikatave pjesëmarrëse janë deklaruar se do të vazhdojë me këtë fushatë lidhur me arsimin publik duke organizuar tryeza e aktivitete të ngjashme në shtetet e tyre.

08.11.2024

Para fillimit të Kongresit 7 të Konfederatës së Sindikatave të Shqipërisë u mbajt Konferenca ndërkombëtare për demokracinë. Në këtë Konferencë kanë marrë pjesë edhe kryetari i SBASHK -ut Rrahman Jasharaj, koordinarori për organizim të brendshëm Ymer Ymeri dhe zyrtari ligjor Blendor Shatri. Mikpritësit, Kolë Nikollaj dhe Anisa Subashi bashkë me përfaqësues të sindikatave pjesëmarrëse kanë diskutuar për sindikatat , dialogun social dhe qasjet e gabuara të qeverive ndaj sindikatave.

Pjesëmarrësit e këtij aktiviteti kanë vlerësuar se kriter se sa ka demokraci në një shtet është qasja e qeverisë ndaj dialogut dhe sindikatave, sepse kudo ka tendenca për luftë kundër sindikatave demokracia zbehet dhe cenohet.

SBASHK-u dhe sindikatat tjera nga vende të ndryshme të Ballkanit dhe Evropës nesër do të jenë musafire të Kongresit 7 të Konfederatës së Sindikatave të Shqipërisë.