Sindikata e Bashkuar e Arsimit Shkencës dhe Kulturës

Konferencë përmbyllëse për sigurinë në punë  dhe mbrojtjen e shëndetit

Prishtinë, 12.05.2023

Sindikata e Arsimit, Kulturës dhe Shkencës e Maqedonisë së Veriut ka organizuar në Shkup Konferencën përmbyllëse për të prezantuar gjetjet nga hulumtimet lidhur me sigurinë në punë dhe mbrojtjen e shëndetit të punëtorëve arsimor. Në këtë konferencë pjesëmarrës ishin edhe përfaqësues të SBASHK-ut dhe të sindikatave të arsimit nga Shqipëria dhe disa shtete të Ballkanit. Në fillimet e këtij aktiviteti  ishte i pranishëm edhe Ministri i Arsimit të Maqedonisë së Veriut Jeton Shaqiri, i cili është ndalur në një bashkëbisedë me kryetarin e SBASHK-ut Rrahman Jasharaj dhe koordinatorin për  organizim të brendshëm Ymer Ymeri duke u interesuar për gjendjen aktuale në arsimin e Kosovës.

Në fjalën hyrëse kryetari i Sindikatës së Arsimit të Maqedonisë së Veriut Joakim Nedelkov ka përshëndetur pjesëmarrësit për të shpalosur angazhimet dhe për të treguar edhe për sfidat dhe arritjet e kësaj sindikate. Ai ka treguar për hulumtimet e bëra Sindikata dhe Asociacioni i  Maqedonisë për sigurinë dhe mbrojtjen e shëndetit. Këto gjetje i ka prezantuar pastaj  përgjegjësi i këtij Asociacioni, Milan Petkovski duke hapur pastaj diskutimin lidhur me sigurinë në  institucione arsimore dhe për faktorët që ndikojnë në shëndetin e punëtorëve arsimor për të veçuar presionet, stresin  dhe kushtet  e punës.

Ministri i Arsimit të Maqedonisë së Veriut ka përgëzuar sindikatën për këtë aktivitet dhe është shprehur i lumtur që sindikata e arsimit të Maqedonisë së Veriut ka bashkëpunim të shkëlqyer me sindikatën e arsimit nga Kosova dhe nga shtete të tjera të Ballkanit.

Përfaqësuesit e sindikatave  të arsimit nga disa vende të Ballkanit kanë treguar për situatën aktuale të arsimit në shtetet e tyre duke treguar se një sfidë e madhe është edhe siguria jo e duhur në institucione arsimore dhe për kujdesin e munguar ndaj shëndetit të punëtorëve të arsimit e duke kërkuar që të ketë çdo vit  aktivitet të organizuar nga institucione shëndetësore për të parë nga afër shëndetin momental të punëtorëve arsimor në të gjitha nivelet.

Kryetari i SBASHK-ut Rrahman Jasharaj ka falënderuar mikpritësin për organizimin e këtij aktiviteti e pastaj ka shprehur kënaqësinë për bashkëpunimin e shkëlqyer në mes të sindikatave të këtyre dy shteteve. Ai ka kujtuar se të dy sindikatat në përpjekje për të realizuar kërkesat e anëtarësisë kanë bërë shumë angazhime dhe veprime sindikale dhe gjithmonë kanë mbështetur moralisht  njëra-tjetrën. "Fati dhe gjendja aktuale e arsimit në shumë nga shtetet e Ballkanit është i njëjtë dhe prandaj duhet forcuar bashkëpunimin mes sindikatave  duke shtuar solidaritetin dhe mbështetjen për cilën do nga sindikatat që gjendet në veprime sindikale duke u përpjekur për realizimin e kërkesave legjitime të anëtarësisë", ka deklaruar kryetari Jasharaj. Delegacioni i SBASHK-ut  ka zhvilluar takime të ndara me shumë nga delegacionet e sindikatave duke  këmbyer ide për angazhimet sindikale në të ardhmen.