Angazhim e përkushtim i mësimdhënësve në shumë komuna të Kosovës
Prishtinë, 13.03.2023
Edhe fundjava e 11 e 12 marsit i ka gjetur shumë anëtare e anëtarë të SBASHK-ut në ambiente shkollore duke qenë pjesë e trajnimeve të organizuara sipas vullnetit të tyre. Stafi qendror ka bërë përgatitjet e duhura dhe në koordinim me kryetarët e nivelit komunal sindikal dhe me trajnerët e angazhuar janë përkujdesur për rrjedhën e mbarë të këtij aktiviteti.
Kështu në Suharekë e diela e 12 marsit ka shënuar ditën e dytë të trajnimeve "Roli i aktiviteteve kreative në mësimdhënie dhe zbatimi i tyre në shkollat fillore" me trajnerin Ahiret Mehmeti dhe "Edukimi dhe menaxhimi mjedisor në Arsimin Parauniversitar" me trajnerët Agim Hasani dhe Nora Ajeti. Në Prizren, pas përfundimit të pjesës së parë të trajnimit "Aplikimi i programeve kompjuterike në mësimdhënie", me trajnerët Albert Samadarxha, Arben Zymberi dhe Xhelal Krasniqi, pjesëmarrësit kanë dëshmuar arritjet e tyre në testin e monitoruar nga koordinatori për organizim të brendshëm Ymer Ymeri dhe anëtarët e stafit qendror Vlora Rexhepi Berisha dhe Blendor Shatri. Në Prizren një grup mësimdhënësish po vazhdon me këtë trajnim udhëhequr nga trajneri Nexhemdin Gruda. Po në këtë komunë ka vazhduar trajnimi "Udhëheqja dhe planifikimi strategjik në Arsimin Parauniversitar" me trajnerin prof. dr. Hysen Sogojeva dhe trajnimi "Roli i aktiviteteve kreative në mësimdhënie dhe zbatimi i tyre në shkollat fillore" me trajneren Esengyl Dinovci.
Në fundjavën e 12 e 13 marsit në Kamenicë kanë vazhduar dy grupe mësimdhënësish në trajnimin "Aplikimi i programeve kompjuterike në mësimdhënie"me trajnerët Fadil Gashi dhe Adhurim Maka.
Edhe në komunë e Drenasit, pas kryerjes së pjesës së parë të trajnimit "Aplikimi i programeve kompjuterike në mësimdhënie", udhëhequr nga trajneri Fejzullah Berisha pjesëmarrësit kanë treguar njohuritë e arritura në testin e monitoruar nga koordinatori për organizim të brendshëm Ymer Ymeri dhe anëtarja e stafit qendror Afërdita Ahmeti.
Ky aktivitet ka vazhduar të organizohet në trajnimin "Udhëheqja dhe planifikimi strategjik në Arsimin Parauniversitar", udhëhequr nga trajneri dr. Safet Beqiri. Me organizimin e këtij aktiviteti SBASHK-u ka vazhduar edhe në komunën e Podujevës me trajnimin "Udhëheqja dhe planifikimi strategjik në Arsimin Parauniversitar", udhëhequr nga trajneri Fahri Hoxha dhe trajnimin "Forcimi i kapaciteteve për udhëheqjen efektive të dialogut social" , udhëhequr nga trajnerja Nora Haliti.