Sindikata e Bashkuar e Arsimit Shkencës dhe Kulturës

Debat konstruktiv e përmbajtjesor me veprimtarët sindikalë
Prishtinë, 01.02.2023
Duke vazhduar me realizimin e agjendës së vizitave nëpër komuna kryetari i SBASHK-ut Rrahman Jasharaj bashkë me nënkryetaren Vjollca Shala dhe koordinatorin për organizim të brendshëm Ymer Ymeri kanë vizituar komunën e Vushtrrisë. Ata të shoqëruar nga kryetari i Kuvendit të Sindikatës së Arsimit Parauniversitar për Vushtrrinë Visar Sadriu janë takuar me kryetarin e kësaj komune Ferit Idrizi. Përfaqësuesit e SBASHK-ut kanë falënderuar kryetarin Idrizi për korrektësinë dhe angazhimet e shumta në shërbim të arsimit dhe të realizimit të kërkesave legjitime të punëtorëve arsimor në këtë komunë. Kryetari i Vushtrrisë z.Ferit Idrizi ka shprehur respekt për gjithë angazhimet e SBASHK-ut duke u shprehur se do të vazhdohet me komunikimin korrekt dhe me angazhimet e përbashkëta në shërbim të arsimit në këtë komunë.
Pas kësaj përfaqësuesit e SBASHK-ut janë gjendur në ambientet e Shtëpisë e Kulturës "Hasan Prishtina" për të marrë pjesë në Kuvendin e punës së Sindikatës së Arsimit Parauniversitar të Vushtrrisë. Në hapje të këtij takimi kryetari Visar Sadriu ka bërë një shpalosje të aktiviteteve në nivel komunal dhe ka falënderuar përfaqësuesit e nivelit qendror të SBASHK-ut.
Kryetari Jasharaj në fjalën përshëndetëse ka shprehur respekt për unitetin e anëtarësisë në këtë komunë dhe për respektin që ata tregojnë për të dhe për stafin qendror. Pas kësaj është zhvilluar bashkëbisedë dhe në pyetjet e pjesëmarrësve janë përgjigjur nënkryetarja Vjollca Shala dhe koordinatori për organizim të brendshëm Ymer Ymeri.