Edhe një Seminar i përmbyllur me shumë sukses
Ka nisur të shpaloset me sukses një Projekt i madh i KEC-it dhe SBASHK-ut e që ka për qëllim forcimin e SBASHK-ut dhe përgatitjen në përballje me sfidat dhe kërkesat e kohës. Ky projekt i madh është financuar nga BE-ja dhe po zhvillohet me shumë sukses. Angazhimi i radhës ishte Seminari me temën kryesore “Vlerësimi organizativ dhe zhvillimi i burimeve njerëzore në SBASHK”.
Vetë natyra e punës së këtij seminari ka kërkuar që në të të jenë të përfshirë kryetarët e Kuvendeve të Sindikatave të SAF e SAM të Kosovës dhe ai i SUSHK-ut. Kjo ngase ata duhet të jenë të parët në ndërmarrjen e iniciativave dhe në kryerjen e detyrave në shërbim të gjithë anëtarësisë. Seminari, edhe pse ishte katër (4) ditor angazhimi i përkushtuar i ligjëruesit z.Osman Buleshkaj dhe përkushtimi i pjesëmarrësve ka bërë që për as edhe një moment të mos mungonte atmosfera e punës.
Nga tema kryesore “Vlerësimi organizativ dhe zhvillimi i burimeve njerëzore në SBASHK” janë shpalosur pastaj shumë çështje dhe pjesëmarrësit kanë mësuar gjëra të reja të cilat gjatë ushtrimeve e punës në grupe i kanë kthyer në dituri të përvetësuara. Çështja e angazhimeve të reja në shërbim të anëtarësisë, komunikimi dhe informimi me kohë dhe i saktë i sindikalistëve dhe opinionit, vlerësimi dhe vetëvlerësimi, qasja e drejt në shërbim të SBASHK-ut i angazhimit me të tjerët, forcimi i resurseve njerëzore, përgatitja e kuadrove udhëheqëse për t’u përballur me sfidat, gjetja e mundësive të reja për të plotësuar kërkesat e drejta të anëtarësisë, format e komunikimit me pushtetin lokal dhe qendror për të gjetur zgjidhje për çështjet e shtruara nga anëtarësia, ishin vetëm disa nga çështjet e shtruara nga ligjëruesi z.Buleshkaj. Pjesëmarrësit janë shprehur se ishte ky një seminar shumë i qëlluar dhe i suksesshëm dhe se të gjithë kanë mësuar gjëra të reja që do t’i vënë në shërbim të aktiviteteve të përditshme sindikale. Ata i janë mirënjohës BE-së, e cila ka financuar këtë aktivitet të rëndësishëm.
Ajo që duhet shtuar është se anëtarët e KD-së dhe Kryesia e SBASHK-ut gjatë ditëve të Seminarit nuk janë marrë vetëm me detyrat që shtroheshin aty, por kanë zhvilluar edhe takime me rëndësi me komisionin e MASHT-it, duke dhënë kontribut në tekstin final të Projektligjit për mësimdhënësit e viteve 90-99 dhe duke zhvilluar një takim vëllazëror me kryetarin e SPASH-it, z. Nevruz Kaptelli dhe delegacionin që shoqëronte atë. Vlerësim i përbashkët nga ky takim ishte se marrëdhëniet mes SBASHK-ut dhe Sindikatave të Arsimit të Shqipërisë janë vëllazërore dhe se bashkërisht do të punojnë për Projekte dhe angazhime të përbashkëta në shërbim të anëtarësisë.