Mësimdhënësit sindikalistë vlerësuan lartë Trajnimin në Gjakovë
Prishtinë 28.04.2014-Ka përfunduar me sukses Punëtoria tre ditore e organizuar nga SBASHK-u dhe KEC-i e në përkrahje nga BE-ja. Kjo Punëtori është zhvilluar në Gjakovë me pjesëmarrjen e 30 mësimdhënësve sindikalistë nga Komunat e Kosovës. Pjesëmarrësit nuk ishin dëgjues pasivë, por gjatë rrjedhës së punës kanë dhënë kontributin e tyre të çmuar në përpjekje për të shtuar kapacitet e për ta fuqizuar edhe më shumë rolin e SBASHK-ut në hartimin e politikave arsimore.
Për të përcjellë te lexuesi të vërtetën nga atmosfera e punës në këtë Punëtori po bazohemi në përshtypjet, që shumë nga ata i kanë lënë të shkruara në SBASHK.
“ Jam shumë e kënaqur që isha pjesë e këtij trajnimi. Relacionet pjesëmarrës-ligjërues ishin në nivel dhe mbretëronte respekti i ndërsjellë. Shpresoj se ky nuk do të jetë trajnimi i fundit që marr pjesë unë, po do të kem fatin të marr pjesë edhe në trajnime të tjera të organizuara nga SBASHK-u dhe KEC. Ju lus të kemi edhe tema të tjera në trajnimet tjera”, është shprehur në letrën e saj pjesëmarrësja në këtë Punëtori nga Gjakova, znj. Indira Shehu.
Ka lavdëruar rrjedhën e Punëtorisë edhe Fidan H. Shaqiri nga SHFMU “Skënderbeu” Përlepnicë. “ “Duke filluar nga qëllimi i qartë i trajnimit për fuqizimin e rolit të sindikatës më të madhe në vendin tonë nuk kisha si të mos përgjigjem pozitivisht me pjesëmarrje në një organizim të tillë. Informacionet, aktivitetet, debatet dhe shumë veprimtari tjera të realizuara gjatë këtyre 3 ditëve kanë ndikuar shumë në ngritjen e kapaciteteve të mija intelektuale , të cilat do të jenë në shërbim të efikasitetit të punës në vendin ku punoj, e në veçanti në detyrën e kryetarit të Shoqatës sindikale në nivel shkolle. Të punojmë bashkë që roli i Sindikatës të jetë kyç në mbrojtjen e të drejtave dhe kërkesave të mësimdhënësve kudo që janë ata”, ka thënë veç tjerash z. H.Shaqiri.
Punëtoria kishte dy Fidana dhe po të dy me mbiemrin Shaqiri. Edhe Fidan Shaqiri nga Komuna e Shtimes ka lënë në letër përshtypjet e tij për Punëtorinë e mbajtur në Gjakovë. “SBASHK-u i ka rënë pikës. Natyrisht kjo punëtori është vetëm një pjesë e aktiviteteve që ofron kjo Organizatë, që qëndron në majat e të gjitha organizatave tjera sindikale dhe jo vetëm pse ka numrin më të madh të anëtarësisë, por edhe për arsye të angazhimeve e aktiviteteve. Të gjithë ne pjesëmarrësit e kësaj Punëtorie do të bëhemi burim përvoje dhe njohurish për shoqatat sindikale”, ka shkruar veç tjerash në përshtypjet e tij. z. Shaqiri.
Edhe Rasim Morina ka lavdëruar rrjedhën dhe arritjet e kësaj punëtorie. “Ka qenë trajnim përmbajtjesor, trajnim që ka hedhur hapa para drejt fuqizimit edhe më të madh të SBASHK-ut me bazë edhe më të fuqishme konceptuale e ideore. Trajnim i suksesshëm ishte ky dhe e konsideroj si hap përpara drejt zhvillimit dhe planifikimit strategjik të SBASHK-ut”, shprehet z. Morina.
“Mësova gjëra të reja dhe ato do t’i zbatoj me kolegët në shkollën time. U njoftova me shumë kolegë nga Komunat tjera dhe shkëmbyem përvoja. Edhe kjo është vlerë e kësaj Punëtorie dhe e SBASHK-ut”, ka thënë në përshtypjet e tij z.Dibran Hajdini.
Edhe znj.Antigona Berisha nga Peja ka lënë në letër përshtypjet e saj për Punëtorinë. “Fitova njohuri të reja që do të më duhen në punë në të ardhmen. Qdo gjë ishte e përgatitur me përkushtim dhe kjo më bën që të marr pjesë edhe në Punëtori të tjera të organizuara nga SBASHK-u”, shprehet znj. Berisha.
“ Kemi mësuar gjëra të reja dhe atmosfera ishte kolegjiale dhe e punës. Temat e trajtuara ishin shumë të qëlluara dhe prandaj kishin ngjallur vëmendjen dhe interesimin tonë. Uroj që njohuritë tona të gjejnë zbatim dhe kjo do ta fuqizonte edhe më shumë organizimin tonë sindikal”, ka thënë kolegu ynë sindikalist z.Bedri Mahmuti.
Është kthyer në Deçan me përshtypje fort të mira nga kjo Punëtori edhe mësimdhënësja e sindikalistja nga Deçani, prof. Alma Berisha.
“Jam shumë e kënaqur dhe ndjehem e privilegjuar që pata fatin të jem pjesë e këtij trajnimi. Kam fituar njohuri të reja për organizimin sindikal dhe për organizimin e tërësishëm të arsimit në Kosovë. Uroj që të jem pjesë edhe e trajnimeve të tjera. Kryesisë së SBASHK-ut i uroj arritje të reja dhe për gjithë angazhimet në shërbim të arsimit do ta kenë përkrahjen e gjerë të gjithë anëtarësisë”, shprehet profesoresha Berisha.
“Edhe pse bëra një rrugë të gjatë e në një ditë me shi, duke ndërruar autobusë e taksi, s’ka gjë se sikur m’u shpërblyen sepse në ambientet e mbajtjes së Punëtorisë te “Qarshia e Jupave” gjeta një pritje të ngrohtë dhe shumë mikpritje. Punëtoria kishte një rrjedhë spontane dhe të gjithë po mësonim e po kontribuonim”, ka thënë pjesëmarrësi në këtë Punëtori nga Vitia, z. Ruzhdi Ibrahimi.
Në SBASHK nuk fshehim kënaqësinë për këto fjalë që na japin forcë për të vazhduar me aktivitetet dhe angazhimet dhe të jemi bashkë e në SBASHK për t’i shërbyer arsimit dhe edukimit të brezave.