Sindikata e Bashkuar e Arsimit Shkencës dhe Kulturës

Prishtinë, 10.02.2018

Këshilli Drejtues i SBASHK-ut ka vendosur unanimisht që të fillohet me veprime të përshkallëzuara sindikale. Kështu që më 14 shkurt do të fillohet me grevën njëorëshe që nënkupton grevë në orën e parë të mësimit në ndërrimin e paradites dhe në atë të pasdites, për të vazhduar më 20 shkurt me grevën dyorëshe në të dy ndërrimet. U vendos që për veprimet tjera të debatohet edhe më 24 shkurt në Kongresin e SBASHK-ut duke insistuar që atëherë të shpallet greva e përgjithshme deri në realizimin e të gjitha pikave të Marrëveshjes së 5 qershorit 2017 , por duke mos përjashtuar edhe format tjera të veprimit sindikal, siç janë edhe protestat masive në Prishtinë.

Pasi ka mbajtur takimin e rregullt për të analizuar përgatitjet për Kongresin zgjedhor , që mbahet më 24 shkurt 2018, Këshilli Drejtues i SBASHK-ut, po të shtunën , ka mbajtur një takim të jashtëzakonshëm për të analizuar deklarimet me shkrim të anëtarësisë dhe për të marr veprime sindikale për shkak të mos respektimit nga ana e Koalicionit, që tani udhëheq me Qeverinë, të marrëveshjes së nënshkruar me SBASHK-un, më 5 qershor 2017.
Kryetari i SBASHK-ut Rrahman Jasharaj ka informuar anëtarët e Këshillit Drejtues me përpjekjet që ai me bashkëpunëtorët kanë bërë që në takimet dhe dialogun me Kryeministrin Haradinaj , me Zv/Kryeministrat Limaj e Hoxhaj, me Ministrin Bytyqi e Ministrin Hamza të realizojnë premtimet nga Marrëveshja e nënshkruar me tani kryeministrin Haradinaj dhe me Kryeparlamentarin Veseli. Anëtarët e Këshillit Drejtues janë deklaruar se në shenjë respekti për të gjithë ata që punuan në vitet më të vështira të Kosovës, e veçmas në lartësim të kujtimit për kolegët tanë të asaj kohe, që kanë kaluar në amshim tenderojnë kategorik në mbrojtjen e Ligjit mbi statusin e punëtorëve të arsimit shqip të viteve të 90-ta dhe pasi dialogu deri tani nuk ka dhënë rezultatin e premtuar që ky Projektligj të shkojë në Qeveri e pastaj edhe në Parlament, ashtu si është thënë edhe në Marrëveshjen e 5 qershorit 2017, të fillohet me veprime sindikale. " Qeveria e Kosovës as në 10 vjetorin e Pavarësisë nuk i nderoj me ligjin e merituar ata që vunë themelet e shtetësisë", ishte kritikë e Këshillit Drejtues drejtuar krerëve të institucioneve të Kosovës.
Këshilli Drejtues i SBASHK-ut ka vendosur unanimisht që të fillohet me veprime të përshkallëzuara sindikale. Kështu që më 14 shkurt do të fillohet me grevën njëorëshe që nënkupton grevë në orën e parë të mësimit në ndërrimin e paradites dhe në atë të pasdites, për të vazhduar më 20 shkurt me grevën dyorëshe në të dy ndërrimet. U vendos që për veprimet tjera të debatohet edhe më 24 shkurt në Kongresin e SBASHK-ut duke insistuar që atëherë të shpallet greva e përgjithshme deri në realizimin e të gjitha pikave të Marrëveshjes së 5 qershorit 2017 , por duke mos përjashtuar edhe format tjera të veprimit sindikal, siç janë edhe protestat masive në Prishtinë.
SBASHK-u kërkon mirëkuptim nga prindërit dhe nxënësit duke treguar se këto veprime janë të shtërnguar t'i marrin jo me dëshirën e tyre, por për shkak të mos angazhimit të institucioneve për realizimin e obligimeve të tyre.

Prishtinë, 01.02.2018

Delegacioni i SBASHK-ut i përbërë nga nënkryetari i parë Lutfi Mani dhe menaxheri për financa e administratë dhe këshilltar për organizim të brendshëm Ymer Ymeri janë takuar sot me drejtorin e DKA-së së kryeqytetit z.Jonuz Salihu.
Delegacioni i SBASHK-ut ka informuar z.Salihun për angazhimet që kjo sindikatë bënë në shërbim të anëtarësisë dhe për përpjekjet që të realizoj kërkesat nga Kontrata Kolektive.
Ata i kanë dhënë theks të veçantë përkushtimit lidhur me projektligjin për statusin e punëtorëve të arsimit të Republikës së Kosovës për vitet '90 duke kërkuar edhe mbështetjen e tij që ky ligj sa më parë të jetësohet.
Ata i kanë bërë apel z.Salihut që Prishtina të realizojë Kontratën Kolektive e veçmas çështjen e pagave jubilare dhe tre pagave përcjellëse me rastin e pensionimit, pa pasur nevojë që kjo çështje të zgjidhet përmes Gjykatës.
Drejtori i DKA-së së Prishtinës, z.Salihu ka shprehur respekt për punën e SBASHK-ut duke u shprehur se është për një bashkëpunim korrekt e të vazhdueshëm me SBASHK-un. Ai ka shtuar se do të mundohet që t'i mbështes kërkesat e SBASHK-ut duke gjetur mundësi për realizimin e tyre sa u takon mësimdhënësve të kryeqytetit.
Poashtu z.Salihu i ka premtuar SBASHK-ut se do të jap kontribut brenda kompetencave të tij për ta jetësuar sa më parë ligjin për statusin e mësimdhënësve të viteve '90.
Ai kërkoi nga SBASHK-u që të vazhdoj me angazhimet e përbashkëta për një arsim edhe më cilësorë.

Prishtinë, 26.01.2018

Arsimtarët e SHFMU "Ali Ajeti " në Sfeçël kanë nënshkruar edhe formularët për grevën e paralajmëruar nga SBASHK-u.

Sindikata e AF dhe e AM të Podujevës në kuadrin e aktvivitetit sindikal, sot ka zgjedhur kryesinë dhe kryetarin e Shoqatës Sindikale të SHFMU"Ali Ajeti " në Sfeçël " . Në këtë mbledhje ku ishte i pranishëm edhe kryetari i SAF e SAM të Podujevës, Fadil Halimi, mësimdhënësit e kësaj shkolle kanë zgjedhur Kryesinë prej 5 anëtarëve me kryetar arsimtarin Burim Bajgorën dhe nënkryetare, mësuesen Shukrije Bajramin. 

Në hapje të takimit, kryetari i SAF e SAM të Podujevës, ka përshëndetur anëtarët e rinj të SBASHK-ut, pastaj ka bërë një pasqyrim të angazhimeve, arritjeve dhe sidave të sindikalistëve të arsimit në këtë komunë. Ai po ashtu në kuadër të bashkëbisedimit me anëtarët e Shoqatës sindikale të shkollës"Ali Ajeti " u është përgjigjur shumë pyetjeve për çështje të caktuara sindikale.

Arsimtarët e kësaj shkolle poashtu kanë nënshkruar edhe formularët për grevën e paralajmëruar nga SBASHK-u dhe janë pajtuar për veprime të mëtejme sindikale.

SBASHK-ut , kohë më parë I janë bashkangjitur edhe Shkollat fillore të Mesmë të ulta të qytetit "Shaban Shala" e Enver Maloku" e "Ibrahim Rugova"

Prishtinë, 18.01.2018

Të nderuara kolege, të nderuar kolegë , anëtarë të SBASHK-ut kudo jeni ju përshëndes.
Ju kujtohet para 4 vitesh një grup i vogël njerëzish ishin kthyer në mikrobe dhe po mundoheshin që me fyerje, shpifje e gënjeshtra të përçanin SBASHK-un. Ne bashkërisht dhe me unitet, përkushtim e me arritje të një pas njëshme i dërguam këta mikrob në deponinë e plehrave.
Këta mikrob duke menduar se jemi në një moment të vendimeve të vështira mund të rinisin me shpifje e gënjeshtra me të njëjtin qëllim që të na përçajnë .
Të nderuara kolege, të nderuar kolegë , anëtarë të SBASHK-ut ne bashkërisht ne këto 4 vite kemi shënuar arritje, që nuk janë të vogla . Jemi nga sindikatat më të organizuara dhe më e fuqishme, jo vetëm në Kosovë, por edhe në Ballkan . Gëzojmë respekt të Evropë e kudo në botë.
Bashkërisht kemi arritur të nënshkruajmë Kontratën Kolektive , e cila na hapi rrugë, që nëse institucionet nuk realizojnë kërkesat tona të bazuara në Kontratë, këto t'i realizojmë nëpër gjykata dhe kështu po bëjmë. Shumë kolegë tanë të pensionuar të mbështetur në gjykata nga SBASHK kanë marrë shpërblimet jubilare dhe tri paga me rastin e pensionimit. Të gjithë anëtarët tanë të pensionuar do ta gëzojnë këtë fitore.
Bashkërisht u angazhuam dhe vepruam me mjete sindikale në momentin e duhur dhe fituam 0.5 % për çdo vit shërbimi,
Të vetmit në Kosovë kemi kontrata pune në kohë të pacaktuar vetëm pas një viti pune,
Jemi të vetmit që fituam betejën dhe kolegëve tanë që pensionohen ju numërohen si vite kontributdhënëse vitet e 90-ta. Ju kujtohet ata filluan t'i dërgonin në pension me 75 euro, por SBASHK-u me angazhime të mëdha bëri të përmirësohet ky defekt dhe ata marrin pensione të plota,
Të nderuara kolege, të nderuar kolegë , anëtarë të SBASHK-ut jemi në centimetrat e fundit të një rrugëtimi të gjatë të përpjekjeve që ta dërgojmë në Parlament Ligjin për statusin punëtorëve të arsimit për vitet e 90-ta . Ta ruajmë unitetin dhe ta arrijmë këtë sukses të madh për hir të gjithë atyre që me sakrifica sublime mbrojtën gjuhën shqipe dhe arsimin e kulturën kombëtare nga furtunat e pushtuesit.
Të nderuara kolege, të nderuar kolegë , anëtarë të SBASHK-ut kemi edhe shumë punë e angazhime. Kemi arritur shumë fitore e në këtë rrugëtim mund ta kemi edhe ndonjë betejë të humbur, por bashkërisht e unik do ta fitojmë çdo luftë në shërbim të anëtarësisë. Ta ruajmë unitetin dhe respektin e ndërsjellë në mënyrë që mikrobet e përçarjes , edhe nëse janë nisur drejt nesh, t'i kthejmë parë në deponinë e mbeturinave.

Me respekt,

Rrahman Jasharaj

Kryetar

Zbritje çmimesh 20 , gjegjësisht 25 % për teste dhe analiza

Prishtinë, 18.01.2018

Në angazhimet e vazhdueshme që të jetë në shërbim të anëtarësisë SBASHK-u ka nënshkruar edhe një marrëveshje për zbritje çmimesh të shërbimeve. Kësaj radhe marrëveshja ka të bëj me Poliklinikën "Olive Medicinal Group" , e cila ndodhet në Lagjen "Kalabria" të Prishtinës. Përgjegjësit e këtij institucioni shëndetësor me rastin e solemnitetit të nënshkrimit të marrëveshjes kanë thënë se këtë po e bëjnë në shenjë respekti për punën dhe përkushtimin e punëtorëve të arsimit në edukimin dhe arsimimin e brezave. Kryetari i SBASHK-ut ka falënderuar stafin udhëheqës të kësaj Poliklinike dhe është shprehur se ky është edhe një angazhim i përbashkët në shërbim të anëtarësisë. 

Marrëveshja saktëson se ajo mundëson pranimin e pacientëve, marrja e mostrave dhe testimi, dhënia e rezultateve dhe nëse ka nevojë edhe konsultimi me mjekun.

Në marrëveshje është saktësuar se shërbimet e laboratorit për anëtarët e ngushtë të familjeve do të jenë me zbritje prej 20 % nga çmimi në kohën e kryerjes së këtij shërbimi , kurse për vetë anëtarët e SBASHK-ut kjo zbritje do të jetë 25 %.

Prishtinë, 17.01.2018

Në kuadër të përpjekjekeve për realizimin e kërkesave të anëtarësisë përmes dialogut, përfaqësuesit e SBASHK-ut vazhdojnë të takohen me përfaqësues të lartë të Qeverisë së Kosovës.
Një takim i tillë është zhvilluar sot më Ministrin e Financave z.Bedri Hamza. Kryetari i SBASHK-ut Rrahman Jasharaj, bashkë me menaxherin për financa dhe këshilltar për organizim të brendshëm Ymer Ymeri kanë përsëritur edhe në bashkëbisedën me Ministrin Hamza kërkesat e SBASHK-ut dhe kanë informuar për situtatën aktuale në arsim. Ata kanë kërkuar mbështetjen financiare të kërkesave të anëtarësisë së SBASHK-ut e posaqërisht kanë kërkuar që të ketë përkrahjen për ligjin e mësimdhënësve të viteve të '90-ta.
Ministri Hamza është shprehur se kupton angazhimin e SBASHK-ut dhe se kërkesat janë reale por është shprehur se duhet mirëkuptim dhe përkushtim për dialogun. Ai është zotuar se ligji i viteve 90-99 do ta ketë mbështetjen e Ministrisë që ai drejton dhe se do të vazhdohet që përmes takimeve të tilla bashkërisht të ketë përpjekje për gjetjen e mundësive buxhetore për mbështetjen e kërkesave të SBASHK-ut.

Limaj në përkrahje të angazhimeve të SBASHK-ut

Prishtinë,11.01.2018
Në kuadër të përpjekjeve të mëdha të SBASHK-ut që çështjet e ngritura të zgjidhen me dialog, kryetari i SBASHK-ut Rrahman Jasharaj dhe menaxheri për financa e këshilltar për organizim të brendshëm Ymer Ymeri kanë pasur sot takime të ndara me Zv/kryeministrin e Kosovës, Fatmir Limaj dhe Me ministrin e MASHT, Shyqiri Bytyqi.
Zv/kryeministri Limaj i ka deklaruar delegacionit të SBASHK-ut se përcjellë vazhdimisht angazhimet dhe përkushtimin e tyre për t'u shprehur se ai fuqishëm përkrah dërgimin sa më të shpejtë të Projektligjit për statusin e punëtorëve të arsimit shqip të Republikës së Kosovës në Parlament sepse, si tha ai, mësimdhënësit e asaj kohe meritojnë resketin më të lartë pasi me mund e sakrifica kanë mbrojtur gjuhën shqipe dhe arsimin në tërësi në ato vite të vështira të Kosovës ."Duhet ruajtur e respektuar personalitetin e mësuesit edhe sot e gjithmonë dhe atij i duhet mbështetja në përpjekjet për një arsim edhe më cilësor. Ne nuk do të veprojmë vetëm, po bashkë me SBASHK-un në të gjitha këto përpjekje " , ka thënë Limaj.
Përfaqësuesit e SBASHK-ut kanë njoftuar zv/kryeministrin Limaj për të gjitha shqetësimet duke treguar se ka tensione të ngritura të punëtorët e arsimit dhe se atyre iu drejtohemi me mesazhe mobilizimi dhe respekti për misionin e tyre të shenjtë në edukimin dhe arsimimin e brezave, duke kërkuar që të japin maksimumin nga vetja e tyre për një arsim më cilësorë.
"Duke monitoruar në orët mësimore inspektorët profesionalë do të vërejnë nga afër dhe do ta vlerësojnë punën e mësimdhënësve dhe pastaj bashkërisht do t'i korrigjojnë të metat eventuale", kanë thënë përfaqësuesit e SBASHK-ut, duke kërkuar angazhimin e z. Limajt që çështjet të zgjidhën me dialog në mënyrë që të mos ketë veprime sindikale, të cilat bazuar në aktualitetin janë shumë të mundshme. 
Në vazhdën e këtyre përpjekje delegacioni i SBASHK-ut zhvilloi një takim pune po sot edhe me Ministrin në MASHT, Shyqiri Bytyqi për të shpalosur me të gjitha çështjet dhe sfidat aktuale.Minsitri Bytyqi është shprehur se kupton angazhimet e SBASHK-ut në përpjekje që ngritja e pagave të mos jetë 4.6 %, por një rritje më e madhe duke shtuar se as ai e as Ministria që drejton nuk është kundër ndonjë rritje tjetër të mundshme, porse kjo varët nga mundësitë buxhetore dhe se nuk është në kompetencat e tij. Po ashtu ai është shprehur i bindur se Projektligji për statusin e punëtorëve të arsimit shqip të Republikës së Kosovës shumë shpejtë do të gjendet para deputetëve të Parlamentit të Republikës së Kosovës.

Ministri Bytyqi e ka ritheksuar edhe një herë se MASHT nuk angazhohet për as një lloj testimi me shkrim për njohuritë e mësimdhënësve , por është duke u angazhuar të gjendet një formë për vlerësimin e përformancës në punë dhe për të gjetur forma që të dihet se për cilat trajnime kanë nevojë mësimdhënësit sipas shkollave e pastaj edhe komunave.
Të dy palët janë shprehur se me angazhime të përbashkëta do të veprojnë në shërbim të arsimit dhe punëtorëve të këtij sektori të rëndësishëm për shtetin tonë.

Prishtinë, 05.01.2018

Pasi që përfaqësuesit e SBASHK-ut janë pajtuar me vendimet e dala nga mbledhja e Kryesisë Ekzekutive të BSPK-së lidhur me angazhimet konkrete në përpjekje për realizimin e kërkesave të anëtarësisë , ata kanë mbajtur një takim të jashtëzakonshëm konsultativ me kryetarët e nivelit sindikal komunal dhe Universiteteve.

Anëtarët e Këshillit Drejtues i kanë përcjellë kryetarit dhe kryesisë së SBASHK-ut reagimet e mësimdhënësve lidhur me deklaratat ofenduese të Kryeministrit Haradinaj në adresë të punëtorëve të arsimit duke përshëndetur reagimin domethënës të SBASHK-ut lidhur me këtë çështje. 

Në këtë takim aty e këtu kishte edhe diskutime me tone të ngritura lidhur me paralajmërimin e Qeverisë për ngritje pagash vetëm 4 % duke përsëritur se këtë ngritje e konsiderojnë fyese. Ata kanë dalë me kërkesën që le të jetë ngritja 4 %, por e bazuar në vlerën 4 % të pagës së Kryeministrit. 

Këshilli Drejtues i SBASHK-ut unanimisht ka vendosur që të niset me përgatitjet për veprime sindikale dhe janë pajtuar që përmes formularëve të nënshkrimeve të merret autorizimi i anëtarësisë për veprime të nevojshme , qoftë si SBASHK apo në koordinim me BSPK-në duke mos përjashtuar edhe grevën e përgjithshme në përpjekje për realizimin për ngritje pagash 4 % të pagës së Kryeministrit, Fillimin e implementimit ët Ligjit për Sigurime Shëndetësore si dhe kërkesave tjera të anëtarësisë së SBASHK-ut.

Kryeministër mësuesit kanë pritur mesazhe mobilizimi nga ju e jo ofendime

Prishtinë,04.01.2018
Kryeministër nuk është mirë të lëndohet personaliteti i mësuesit sepse këta njerëz me përkushtim punuan dhe ishin kthyer në digë për mbrojtjen e arsimit shqip nga sulmet e pushuesit serb në vitet më të vështira të Kosovës . Kryeministër shkollat në Kosovë nga jashtë janë mjaft të bukura, por nga brenda janë tepër të thata sepse në to mungojmë mjetet elementare të punës. Mësuesi ynë ende punon vetëm me shkumës , shpuzë e tabele dhe në këto kushte arritjet në arsimin tonë janë të mira.
I nderuari Kryeministër punëtorët e arsimit në Kosovë kishin pritur me entuziazëm ardhjen tuaj në krye të Qeverisë me shpresën se ju do të dërgoni te ta mesazhe mobilizimi në shërbim të një arsimi edhe më të mirë. Ata kanë pritur që ju do të uleni vazhdimisht dhe do të bashkëbisedoni me SBASHK-un, që është sindikata e tyre, dhe do të gjeni rrugëdalje për të gjitha shqetësimet.
Në vend të kësaj Ju kryeministër në disa paraqitje publike lënduat figurën e mësuesit dhe zhvleftësuat punën e tyre nëpër dekada e vite duke deklaruar , pa bërë analiza nga ekspertët , se gjendja në arsim është shumë e keqe e duke shkuar më tutje se gjoja ata vetëm luajnë shah apo i bëjnë nxënësit e dy a tri ndërrimeve bashkë sa për të thënë se po punojnë, apo edhe se këtë mësuesit nuk kanë qenë nxënës e as studentë të mirë . Kryeministër nuk është mirë të lëndohet personaliteti i mësuesit sepse këta njerëz me përkushtim punuan dhe ishin kthyer në digë për mbrojtjen e arsimit shqip nga sulmet e pushuesit serb në vitet më të vështira të Kosovës . Si ilustrim po kujtojmë vrasjen nga pushtuesi serb të mësuesit Halit Geci. Pas varrimit të tij mësuesit nuk ikën nga fshati po të nesërmen vazhduan mësimin duke mbajtur gjallë shpresat për liri e ardhmëri të Kosovës. Apo po kujtojmë vdekjen nga torturat e pushtuesit të drejtorit Haki Povataj dhe vazhdimin e punës në shkollën e tij dhe në të gjitha shkollat kudo në Kosovë.
I nderuari Kryeministër nuk është mirë që të deklaroheni se nuk mërziteni për paralajmërimet për greva nga SBASHK-u. Në vend të kësaj është më mirë të bisedohet me ta dhe me sindikatat tjera sepse kundër rritjes 4 % janë mësimdhënësit, po se po, por edhe gjithë të punësuarit në sektorin publik dhe kjo është artikuluar përmes sindikatave të tyre në BSPK.
I nderuari Kryeministër ua kemi thënë edhe të tjerëve e po ua themi publikisht edhe Juve se asgjë në arsimin e Kosovës nuk mund të bëhet pa pajtueshmërinë e punëtorëve të arsimit dhe sindikatës së tyre. Ju mund t'i injoroni kërkesat e Mësimdhënësve të artikuluara përmes SBASHK-ut , por në këtë mënyrë po i dërgoni ata drejt grevave. SBASHK-u është unik dhe di të bëj greva i nderuari Kryeministër , por atyre u ka ikur shpesh duke i dhënë përparësi zgjidhjes së çështjeve të ngritura përmes dialogut. 
Kryeministër shkollat në Kosovë nga jashtë janë mjaft të bukura, por nga brenda janë tepër të thata sepse në to mungojmë mjetet elementare të punës. Mësuesi ynë ende punon vetëm me shkumës , shpuzë e tabele dhe në këto kushte arritjet në arsimin tonë janë të mira . Shteti duhet të financojë në arsim dhe të krijojë shkolla të shekullit 21 dhe të shtojë mobilizimin për punë përmes bashkëbisedave me respekt e këshilla mobilizuese e jo me diktate e vlerësime ofenduese ndaj mësuesit dhe profesionit të tij të shenjtë.
Kryeministër nga tani e tutje nga ju , në vend të deklaratave që lëndojnë, presim mesazhe respekti dhe mobilizimi në shërbim të ngritjes së vazhdueshme të cilësisë në arsimin e Kosovës.

Viti 2017 vit i sfidave, angazhimeve dhe arritjeve në SBASHK

Prishtinë,28.12.2017
Për ta bërë një analizë përmbyllëse të angazhimeve , sfidave e arritjeve, SBASHK-u ka mbajtur takim përmbyllës me mediet e shkruara e elektronike. Në hapje të këtij takimi kryetari i SBASHK-ut, Rrahman Jasharaj ka përshëndetur mediet në emër të gjithë anëtarësisë dhe i ka falënderuar ata për korrektësinë dhe informimin e drejtë lidhur me angazhimet, reagimet dhe përpjekjet e SBASHK-ut gjatë gjithë vitit 2017. Jasharaj e ka vlerësuar si sfidues dhe të vështirë vitin 2017 për gjitha sindikatat në Kosovë, por është shprehur se janë shënuar arritje të konsiderueshme. Ai ka përmendur angazhimin dhe arritjen që të stopohet Ligji për pagat në versionin e paraqitur nga Qeveria e kaluar dhe arritjen që në kuadër të këtij ligji të përfillet angazhimi konkrete dhe me fakte i SBASHK-ut në mënyrë që profesioni i mësimdhënësit të radhitet në pozitë të merituar në tabelarin e këtij Ligji. Po ashtu para medieve Jasharaj ka përmendur angazhimin me tërë mundësitë rreth Ligjit për statusin e punëtorëve të arsimit shqip të Republikës së Kosovës për vitet e 90-ta duke shtuar se pas një pune e përkushtimi të madh është arritur të finalizohet ky projektligj dhe se , sipas informacioneve nga MASHT, ai ka shkuar në Qeveri dhe pas debatit për të do të shkojë në Parlament.
Në këtë takim me medie, SBASHK-u është ndalur edhe të angazhimet për realizimin e Kontratës Kolektive. Kryetari i SBASHK-ut ka kujtuar para medieve se pasi që qeveritë lokale nuk kanë kryer obligimin e tyre, SBASHK-u çështjen e ka drejtuar në gjykatat gjegjëse dhe se janë duke u fituar rastet nëpër këto gjykata. Në një pjesë të pyetjeve nga mediet përgjigje ka ofruar menaxheri për financa e administratë dhe këshilltari për organizim të brendshëm , Ymer Ymeri.
SBASHK-u ka thënë në këtë takim se , krahas angazhimeve për realizmin e kërkesave të anëtarësisë janë shënuar edhe aktivitete të shumta në përpjekjet për një arsim edhe më të mirë në Kosovë duke përmendur Konferencën në nivel vendi "Mësimdhënësit ndërtojnë të ardhmen e Kosovës" dhe Konferencën ndërkombëtare " Për Arsim më të mirë në Kosovë" në të cilat SBASHK-u ka prezantuar në mënyrë të denjë zërin e mësimdhënësve të Kosovës.
Duke ju drejtuar mësimdhënësve të Kosovës SBASHK-u u garanton atyre se do të vazhdojë të jetë zë mbrojtës i anëtarësisë dhe punëtorëve të arsimit në tërësi dhe se ka reaguar e do të reagojë në mbrojtjen e personalitetit të mësuesit, por kërkon nga të gjithë angazhime shtesë në misionin e shenjtë të mësimdhënësit në mënyrë që kritikave që vijnë aty e këtu nga individë e institucione t'u përgjigjemi me punë e arritje të reja.